Lissu afanyiwa upasuaji utakaomnyanyua

Tundu Lissu Mbunge wa Singida Mashariki (Chadema),  kesho Juni 4, 2018 atafanyiwa upasuaji wa 21 ambao ndio wa mwisho wa kuunga goti la mguu wake wa kulia ambapo ataweza kutembea bila magongo.

Akiwataka Watanzania wamuombea Lissu aliyekuwepo nchi ubelgiji anaweza kukunjua mguu wake huu ulioathiriwa na shambulio la risasi alizopigwa Septemba 7 mwaka jana jijini Dodoma.

Lissu kupitia ukurasa wake wa mtandao wa picha wa Instagram leo Juni 3 akionekana amelala kwenye wodi huku mkewe Alicia akiwa pembeni yake.

“Hello  wapendwa wangu. Ninaamini wengi wenu, kama sio wote, mnafahamu kwamba Jumatatu Juni 4 nitafanyiwa operesheni ya mwisho kwenye mguu wa kulia,” amesema.

“Ni operesheni kubwa inayotazamiwa kuchukua takriban saa nane kwa taarifa nilizopewa tangu mwanzoni mwa wiki hii. Hivyo madaktari wangu wametumia muda mrefu kidogo kuniandaa kwa ajili ya Jumatatu.”

Ameeleza kuwa  kwa sasa afya yake ipo vizuri na kwamba hiyo ndio operesheni yake ya mwisho.

 “Napenda niwajulishe kwamba ninajisikia vizuri kiafya na baada ya kuwa kitandani tangu  Aprili 11 (2018) nilipofanyiwa operesheni ya pili, sasa niko tayari kwa ajili ya hii ya mwisho. Madaktari wangu wako vizuri. Nina imani watafanya kazi nzuri ya kitabibu.”

Lissu alishawashukuru wote waliomsaidia tangu aliposhambuliwa kwa risasi hadi sasa na kuwataka wazidi kumuombea.

“Bado safari ni ndefu lakini ninaweza kusema nimeanza kuona mwanga katika hili tanuru refu. Nimesema mara nyingi kwamba ninaona fahari na faraja kwamba Watanzania wenzangu na wasio Watanzania wamenitibu na wanaendelea kunitibu. Najua mtaniponya kwa nguvu za Mola wetu na kwa upendo na ukarimu wenu. Nawaombeni msichoke. Nawashukuruni sana,” amesema.